Sual-Cavab

Line Spacing+- AFont Size+- Çap
Dövlət İmtahan Mərkəzinə sualla müraciət etmək istəyirsinizsə, ilk növbədə, aşağıda göstərilən “Ən çox verilən suallar” bölməsi ilə tanış olun. Sizi maraqlandıran suala cavab bu bölmədə öz əksini tapmayıbsa, təqdim olunan formanı dolduraraq sayt vasitəsilə DİM-ə öz sualınızı təqdim edə bilərsiniz. Sualınıza cavab e-mail ünvanınıza göndəriləcək. 
 

Ali təhsil müəssisələrinə qəbul

  • Əvvəlki illərin məzunları ali təhsil müəssisələrinə qəbul imtahanının birincisində iştirak etmədən birbaşa ikinci imtahanda iştirak edə bilərlərmi?
  • 11-ci sinif şagirdiyəm. Fövqəladə Hallar Nazirliyinin Akademiyasına qəbul olmaq istəyirəm. Xüsusi təyinatlı təhsil müəssisələrinə qəbul da buraxılış imtahanının nəticəsinə əsasən aparılır?
  • Tam orta məktəbi keçən il bitirmişəm. Bu il həm Bədən Tərbiyəsi və İdman Akademiyasının, həm də IV qrupa daxil olan ixtisasların müsabiqəsində iştirak etmək istəyirəm. Belə çıxır ki, iki dəfə imtahan verməliyəm?
  • Ötən il rus bölməsinin abituriyenti olmuşam. Azərbaycan dili fənni üzrə imtahandan “məqbul” alsam da, qəbul imtahanında kifayət qədər bal toplaya bilmədiyimə görə ali məktəbə qəbul olmadım. Bu il Azərbaycan dili fənnindən yenə imtahan verməliyəm?
  • Abituriyentlər eyni ildə iki dəfə ali təhsil müəssisələrinin bakalavriat səviyyəsinə qəbul imtahanında iştirak edə bilərlərmi?
  • Mən orta məktəbdə alman dili keçmişəm. Bu, attestatda da göstərilib. Ancaq ingilis dilini daha yaxşı bilirəm. Qəbul imtahanında xarici dil kimi ingilis dilini seçə bilərəm, yoxsa mütləq attestatımda göstərilən xarici dil fənni üzrə imtahan verməliyəm?
  • Ali təhsil müəssisələrinin xüsusi qabiliyyət tələb edən ixtisaslarına qəbul qaydaları necədir?
  • Bu il qəbul imtahanında neçə fənn üzrə açıq tipli test tapşırığından istifadə olunacaq?
  • SAT imtahanının nəticəsi əsasında ADA Universitetinə müsabiqədə iştirak etmək üçün nə etmək lazımdır?
  • Abituriyentlər ali təhsil müəssisələrinə qəbul olmaq üçün ildə iki dəfə imtahan verə bilərlər. Bəs hər iki imtahanda test tapşırıqlarının çətinlik dərəcəsi eyni olacaqmı?
  • İkinci dəfə ali təhsil almaq istəyirəm. Bununla bağlı qəbul qaydaları necədir?
  • Mən Polis Akademiyasında təhsil almaq istəyirəm. Həmin tədris müəssisəsinə sənədlərimi necə təqdim etməliyəm?
  • Mənim oğlum ötən il keçirilən qəbul imtahanlarında iştirak edib lakin qəbul ola bilməyib. Bu ilin iyulun 26-da onun 18 yaşı tamam olacaq. O, builki qəbul imtahanlarında iştirak edə bilərmi?
  • Mən bu il II ixtisas qrupu üzrə imtahan verəcəm. Xarici dil kimi rus dilini seçə bilərəmmi?
  • Mən texnikumda dövlət hesabına təhsil almışam. Ali məktəbə dövlət hesabına daxil ola bilərəmmi?
  • Sənədlərimi xüsusi təyinatlı ali təhsil müəssisələrindən birinə vermək istəyirəm. Digər ali təhsil müəssisələrinin ixtisaslarını da seçə bilərəmmi?
  • Mən III ixtisas qrupu üzrə ali təhsil müəssisələrinə qəbul imtahanlarında iştirak edərək 320 bal toplamışam. İxtisas seçimi zamanı ərizəmdə hansı ixtisasları göstərim ki, hər hansı bir ixtisasa qəbul olunum?
  • Keçid balı ilə müsabiqə şərti anlayışları arasında fərq varmı?
  • Mən orta məktəbdə əla qiymətlərlə oxuyuram. Bilmək istəyirəm ki, ali təhsil müəssisəsinə müsabiqə zamanı bu göstəricim nəzərə alınacaqmı?
  • Mən keçən il kollec bitirmişəm. Bu il isə ali təhsil müəssisələrinə keçiriləcək qəbul imtahanında iştirak etmək istəyirəm. Bunun üçün hansı sənədləri təqdim etməliyəm?
  • Orta məktəbin rus bölməsini bitirirəm. Amma ali məktəbə qəbul zamanı ərizəmdə Azərbaycan bölməsinin ixtisas kodlarını göstərmək istəyirəm. Bu mümkündürmü?
  • Rus bölməsində təhsil alıram, qəbul imtahanını da rus dilində vermək istəyirəm. Bildiyimə görə bu bölmədə təhsil alanlar Azərbaycan dili fənnindən də imtahan verməlidirlər. Bu imtahan barədə ətraflı məlumat almaq istərdim.
  • Mən I ixtisas qrupu üzrə imtahana hazırlaşıram. Milli Aviasiya Akademiyasına daxil olmaq istəyirəm. Oxuduğum məktəbdə bizə xarici dil kimi fransız dili tədris olunur. Qəbulda xarici dil kimi fransız dilindən imtahan verə bilərəmmi?
  • Mən Rusiya Federasiyası Dağıstan Respublikasının vətəndaşıyam və orta məktəbi Dağıstanda bitirmişəm. Bu il Azərbaycan Respublikasının ali təhsil müəssisələrinə qəbul imtahanında iştirak etmək istəyirəm. Sənədlərimi hansı qaydada və harada təqdim etməliyəm
  • Yunan-Roma güləşi üzrə beynəlxalq yarışın qalibiyəm. Ali təhsil müəssisəsinə müsabiqədənkənar qəbul ola bilərəm?
  • Mən elektron ərizəmi təsdiq etdirmişəm. İmtahanın nə vaxt və harada keçiriləcəyi barədə məlumatı necə əldə edəcəyəm?
  • Məlumdur ki, ali məktəblərə qəbul imtahanları zamanı abituriyentin doğru cavabların sayından səhv cavabların sayının 1∕4-i çıxılır (dörd səhv cavab bir doğru cavabı “silir”), bəs açıq tipli test tapşırıqları üzrə də bu qayda tətbiq edilir?

  • Əvvəlki illərin məzunları ali təhsil müəssisələrinə qəbul imtahanının birincisində iştirak etmədən birbaşa ikinci imtahanda iştirak edə bilərlərmi?
    Bəli, istər əvvəlki illərin, istərsə də cari ilin məzunları birinci imtahanda iştirak etmədən birbaşa ikinci imtahanda iştirak edə bilərlər.

    11-ci sinif şagirdiyəm. Fövqəladə Hallar Nazirliyinin Akademiyasına qəbul olmaq istəyirəm. Xüsusi təyinatlı təhsil müəssisələrinə qəbul da buraxılış imtahanının nəticəsinə əsasən aparılır?
    Xeyr, xüsusi təyinatlı təhsil müəssisələrinə qəbul qaydalarında hər hansı dəyişiklik olmayıb və həmin təhsil müəssisələrinə qəbul əvvəlki qaydada həyata keçirilir.

    Tam orta məktəbi keçən il bitirmişəm. Bu il həm Bədən Tərbiyəsi və İdman Akademiyasının, həm də IV qrupa daxil olan ixtisasların müsabiqəsində iştirak etmək istəyirəm. Belə çıxır ki, iki dəfə imtahan verməliyəm?
    Bəli, iki dəfə imtahan verməlisiniz. Çünki, tam orta təhsil səviyyəsini əvvəlki illərdə bitirən abituriyentlər V ixtisas qrupu üzrə müsabiqədə iştirak etmək istəyirlərsə, o zaman V qrup üzrə üç fəndən qəbul imtahanı verməli və müsabiqədə bu imtahandan əldə etdikləri nəticələr əsasında iştirak etməlidirlər. Onu da qeyd edək ki, V ixtisas qrupunu seçən bütün abituriyentlər buraxılış imtahanından və ya V qrup üzrə qəbul imtahanından başqa, müvafiq müsabiqə şərtlərini ödədikləri halda qabiliyyət imtahanı da verməlidirlər.
    V ixtisas qrupuna daxil olan ixtisasların müsabiqəsində iştirak etmək istəyən abituriyentlər istənilən digər ixtisas qruplarından biri (I, II, III və ya IV qrup) üzrə də müsabiqədə iştirak edə bilərlər. Bunun üçün onlar həmin qrup üzrə keçirilən qəbul imtahanında da iştirak etməlidirlər. Abituriyentlər müvafiq müsabiqə şərtlərini ödədikləri halda, seçdikləri ixtisas qruplarına daxil olan ixtisasları elektron ərizələrində istədikləri ardıcıllıqla qeyd edə bilərlər.


    Ötən il rus bölməsinin abituriyenti olmuşam. Azərbaycan dili fənni üzrə imtahandan “məqbul” alsam da, qəbul imtahanında kifayət qədər bal toplaya bilmədiyimə görə ali məktəbə qəbul olmadım. Bu il Azərbaycan dili fənnindən yenə imtahan verməliyəm?
    Xeyr, siz bu il yenidən Azərbaycan dili fənnindən imtahan verməyəcəksiniz. Çünki keçən il Qəbul qaydalarında aparılmış dəyişikliyə əsasən, qəbul imtahanını rus dilində verən abituriyentlər Azərbaycan dili fənni üzrə verəcəkləri test imtahanından “məqbul” qiymət alarlarsa, həmin nəticə cari və növbəti tədris ili üçün etibarlı olacaq. Yəni sizin keçən il Azərbaycan dili fənni üzrə verdiyiniz imtahanın nəticəsi bu il də qüvvədə olacaq.

    Abituriyentlər eyni ildə iki dəfə ali təhsil müəssisələrinin bakalavriat səviyyəsinə qəbul imtahanında iştirak edə bilərlərmi?
    Ali təhsil müəssisələrinin bakalavriat səviyyəsinə qəbul qaydalarında edilən dəyişikliyə əsasən abituriyentlərə seçdikləri hər hansı bir ixtisas qrupu üzrə ( V ixtisas qrupu istisna olmaqla) eyni tədris ilində keçirilən qəbul imtahanlarında iki dəfə iştirak etməyə icazə verilir. Bu o deməkdir ki, həm cari ilin, həm də əvvəlki illərin məzunları qəbul imtahanında iki dəfə iştirak edə bilərlər. Abituriyentlər müsabiqədə hansı imtahanın nəticəsi ilə iştirak edəcəyini özləri müəyyən edəcəklər.

    Mən orta məktəbdə alman dili keçmişəm. Bu, attestatda da göstərilib. Ancaq ingilis dilini daha yaxşı bilirəm. Qəbul imtahanında xarici dil kimi ingilis dilini seçə bilərəm, yoxsa mütləq attestatımda göstərilən xarici dil fənni üzrə imtahan verməliyəm?
    Ali məktəblərin I, II və III ixtisas qrupları üzrə sənəd verən abituriyentlər orta məktəbdə hansı xarici dili keçməsindən asılı olmayaraq qəbul elanında göstərilən bu və ya digər xarici dildən imtahan verə bilər. Bir şərtlə ki, abituriyent ərizə formasını doldurarkən orada imtahan vermək istədiyi xarici dili qeyd etmiş olsun.
    Ali məktəblərin V ixtisas qrupu üzrə sənəd verən abituriyentlər:
    - orta məktəbi cari ildə bitirdikləri təqdirdə - müsabiqədə buraxılış imtahanının nəticəsi əsasında iştirak etdiklərinə görə orta məktəbdə hansı xarici dil tədris olunursa həmin dil üzrə də buraxılış (qəbul) imtahanı verirlər;
    - orta məktəbi əvvəlki illərdə bitirdikləri təqdirdə - orta məktəbdə hansı xarici dili keçməsindən asılı olmayaraq qəbul elanında göstərilən bu və ya digər xarici dildən imtahan verə bilər. Bir şərtlə ki, abituriyent ərizə formasını doldurarkən orada imtahan vermək istədiyi xarici dili qeyd etmiş olsun.


    Ali təhsil müəssisələrinin xüsusi qabiliyyət tələb edən ixtisaslarına qəbul qaydaları necədir?
    Ali təhsil müəssisələrinin xüsusi qabiliyyət tələb edən ixtisasları (I ixtisas qrupuna daxil olan “Memarlıq” ixtisası istisna olmaqla) V ixtisas qrupuna daxildir.
    Tam orta (11-illik) təhsil səviyyəsini Azərbaycan Respublikasının ümumtəhsil müəssisələrində cari ildə bitirən abituriyentlər V ixtisas qrupu üzrə ayrıca qəbul imtahanı vermirlər və müsabiqədə buraxılış imtahanından Azərbaycan (rus) dili, riyaziyyat və xarici dil ( xarici dil keçməyən abituriyentlər kimyadan) fənlərindən əldə etdikləri nəticələr əsasında iştirak edirlər.
    Tam orta təhsil səviyyəsini əvvəlki illərdə və ya xarici ölkələrdə bitirən abituriyentlər V ixtisas qrupu üzrə müsabiqədə iştirak etmək istəyirlərsə, o zaman buraxılış imtahanı keçirilən qaydada Azərbaycan (rus) dili, riyaziyyat və xarici dil ( xarici dil keçməyən abituriyentlər kimyadan) fənləri üzrə qəbul imtahanı verməli və müsabiqədə bu imtahandan əldə etdikləri nəticələr əsasında iştirak etməlidirlər.


    Bu il qəbul imtahanında neçə fənn üzrə açıq tipli test tapşırığından istifadə olunacaq?
    Ali təhsil müəssisələrinin I-IV ixtisas qrupları üzrə qəbul imtahanlarında çoxseçimli (qapalı) tipli tapşırıqlarla bərabər, açıq tipli test tapşırıqlarından da istifadə edilir. Qəbul imtahanlarında hər ixtisas qrupunda 3 fəndən hər birində 4 açıq tipli test tapşırığından istifadə olunması nəzərdə tutulur. Belə tapşırıqlar I qrupda riyaziyyat, fizika, kimya; II qrupda riyaziyyat, coğrafiya, ana dili; III qrupda riyaziyyat, tarix, ana dili; IV qrupda isə riyaziyyat, kimya, biologiya fənləri üzrə təqdim olunur.

    SAT imtahanının nəticəsi əsasında ADA Universitetinə müsabiqədə iştirak etmək üçün nə etmək lazımdır?
    “ADA” Universitetinin bakalavriat səviyyəsinə qəbul iki yolla aparılır:
    1. DİM-in keçirdiyi qəbul imtahanlarının nəticələri vasitəsilə;
    2. Beynəlxalq SAT imtahanı nəticəsi vasitəsilə.

    SAT imtahanının nəticəsi ilə müraciət edənlər üçün müəyyən olunmuş tələblər (son tarix 15 iyun 2017-ci ildir):
    ərizə qəbulu müddətində (aprel ayının 10-dək) “Abituriyentin elektron ərizəsi”ni ümumi qaydada təsdiq etdikdən sonra ərizənin surətini və SAT imtahanı balı haqqında məlumatı iyun ayının 15-ə qədər DİM-ə təqdim etmək;
    • SAT imtahanı nəticələrini elektron şəkildə College Board saytında (https://www.collegeboard.org) Dövlət İmtahan Mərkəzinə (kod 7876) və “ADA” Universitetinə (kod 7799) göndərmək;
    • “ADA” Universitetinin elektron ərizə formasını doldurmaq. Elektron ərizə forması üçün keçid: www.ada.edu.az/apply;
    • IELTS və ya TOEFL imtahanının nəticəsini "ADA"-nın elektron ərizə formasına yükləmək (nəticələrin göndərilməsi üçün kod 2093). Qəbul üçün minimum bal tələbi qoyulmur;
    • Azərbaycanda yerləşən ümumtəhsil məktəblərinin rus, ingilis və ya gürcü bölmələrini cari ildə bitirən, eləcə də ümumtəhsil məktəbini əvvəlki illərdə və ya xaricdə bitirən abituriyentlər “Azərbaycan dili” fənni üzrə qəbul imtahanında iştirak edərək “məqbul” qiyməti almalıdırlar. Bunun üçün onlar aprelin 10-dək dim.gov.az saytında “Abituriyentin elektron ərizəsi” formasını doldurarkən "test imtahanı verəcəyi dil" bölməsində rus dilini seçməlidirlər. “Azərbaycan dili” fənni üzrə keçiriləcək imtahanın tarixləri DİM-in saytında yerləşdirilmişdir (http://dim.gov.az/news/events/2030/). 2016-cı ildə Azərbaycan dili fənni üzrə imtahandan "məqbul" alan abituriyentlər cari ildə bu imtahanda iştirak etmədən müsabiqəyə buraxılırlar. Azərbaycanda yerləşən ümumtəhsil məktəblərinin Azərbaycan bölməsini cari ildə bitirən abituriyentlər isə buraxılış imtahanında iştirak edərək Azərbaycan dili fənni üzrə minimal 15 bal toplamalıdırlar;
    • “ADA” Universitetinin pedaqoji heyətindən ibarət komissiya tərəfindən keçiriləcək müsahibədə iştirak etmək. Müsahibə iyun ayında sənəd qəbulu prosesi bitdikdən sonra keçiriləcəkdir.


    Abituriyentlər ali təhsil müəssisələrinə qəbul olmaq üçün ildə iki dəfə imtahan verə bilərlər. Bəs hər iki imtahanda test tapşırıqlarının çətinlik dərəcəsi eyni olacaqmı?
    Təbii ki, hər iki imtahan üçün test tapşırıqları vahid texniki tapşırıq əsasında hazırlanacaq və onların çətinlik dərəcəsi eyni olacaq.

    İkinci dəfə ali təhsil almaq istəyirəm. Bununla bağlı qəbul qaydaları necədir?
    İkinci ali təhsil almaq istəyən abituriyentlər ümumi qaydada DİM-in keçirdiyi qəbul imtahanlarında iştirak etməlidirlər. Belə abituriyentlər qəbul elanında qeyd olunan sənədlərlə yanaşı Sənəd Qəbulu Komissiyasına ali təhsil haqqında sənədi (əslini), ali təhsilinin dövlət hesabına olub-olmaması barədə təhsil aldığı müəssisə tərəfindən verilən arayışı, attestatın əslini və ya məzunu olduğu təhsil müəssisəsi tərəfindən verilən attestat qiymətləri göstərilən arayışı təqdim etməlidirlər.

    Mən Polis Akademiyasında təhsil almaq istəyirəm. Həmin tədris müəssisəsinə sənədlərimi necə təqdim etməliyəm?
    Xüsusi təyinatlı təhsil müəssisələrinə, o cümlədən Polis Akademiyasına qəbul iki mərhələdə aparılır. Birinci mərhələdə abituriyentlər tələb olunan sənədləri təqdim etdikdən sonra həmin təhsil müəssisəsində təşkil olunmuş həkim və seçim komissiyalarından keçməli, sonrakı mərhələdə isə müəyyən edilmiş fənlərdən Dövlət İmtahan Mərkəzi tərəfindən keçirilən test imtahanı verməlidirlər.

    Mənim oğlum ötən il keçirilən qəbul imtahanlarında iştirak edib lakin qəbul ola bilməyib. Bu ilin iyulun 26-da onun 18 yaşı tamam olacaq. O, builki qəbul imtahanlarında iştirak edə bilərmi?
    Səfərbərlik və Hərbi Xidmətə Çağırış üzrə Dövlət Xidmətinin müvafiq təlimatınsa əsasən, iyul ayının 30-dək 18 yaşı tamam olmuş gənclərin hərbi sənədlərində çağırışdan möhlət haqqında Xidmətin müvafiq qeydiyyatı və möhlət haqqında arayışı olmalıdır. Oğlunuz yalnız bu halda qəbul imtahanlarında iştirak etmək üçün sənəd verə bilər.

    Mən bu il II ixtisas qrupu üzrə imtahan verəcəm. Xarici dil kimi rus dilini seçə bilərəmmi?
    Bəli, ali təhsil müəssisələrinə I, II və III ixtisas qrupları üzrə Qəbul imtahanını Azərbaycan dilində verən abituriyentlər xarici dil kimi rus dilini seçə bilərlər.

    Mən texnikumda dövlət hesabına təhsil almışam. Ali məktəbə dövlət hesabına daxil ola bilərəmmi?
    Bəli, sizin ali təhsil müəssisəsində dövlət hesabına təhsil almaq hüququnuz var. Siz yenidən dövlət hesabına orta ixtisas təhsili ala bilməzsiniz.

    Sənədlərimi xüsusi təyinatlı ali təhsil müəssisələrindən birinə vermək istəyirəm. Digər ali təhsil müəssisələrinin ixtisaslarını da seçə bilərəmmi?
    Xüsusi təyinatlı ali təhsil müəssisəsini seçən abituriyentlər (həmin ali təhsil müəssisəsinin təşkil etdiyi yoxlamalardan uğurla keçdiyi təqdirdə) ixtisas seçimi zamanı bu ali təhsil müəssisəsinin ixtisası ilə yanaşı, mülki ali təhsil müəssisələrinin ixtisaslarını da seçə bilərlər. Lakin yadda saxlamaq lazımdır ki, hər hansı xüsusi təyinatlı ali təhsil müəssisəsini seçən abituriyent, ilk növbədə bu ali təhsil müəssisəsinin ixtisası üzrə müsabiqədə iştirak edir. Xüsusi təyinatlı ali təhsil müəssisəsinə qəbul olunan abituriyent digər ali təhsil müəssisələrinin müsabiqəsinə buraxılmır.

    Mən III ixtisas qrupu üzrə ali təhsil müəssisələrinə qəbul imtahanlarında iştirak edərək 320 bal toplamışam. İxtisas seçimi zamanı ərizəmdə hansı ixtisasları göstərim ki, hər hansı bir ixtisasa qəbul olunum?
    Ayrı-ayrı ixtisaslar üzrə keçid ballarının bu il hansı səviyyədə formalaşacağı barədə müsabiqədən əvvəl dəqiq məlumat vermək mümkün deyil.
    Abituriyentlərin ixtisas seçimi zamanı müsabiqə vəziyyəti yüksək və aşağı olan ixtisaslar haqqında ümumi məlumat əldə edib, təxmini istiqamət götürə bilmələri üçün DİM tərəfindən əvvəlki illərin keçid balları dərc olunur. Lakin bəzi abituriyentlər belə düşünürlər ki, ayrı-ayrı ixtisaslar üzrə əvvəlki ilin keçid balları növbəti ildə eynilə təkrarlanır. Bu, birtərəfli yanaşmadır, ona görə ki, keçid balı ildən-ilə ya azalmağa, ya da artmağa doğru dəyişə bilər.

    Keçid balı ilə müsabiqə şərti anlayışları arasında fərq varmı?

                Müsabiqə şərti DİM tərəfindən hər hansı bir ixtisas qrupu üzrə müsabiqəyə buraxılmaq üçün qoyulan minimal tələbdir. Keçid balı isə müsabiqə nəticəsində hər hansı ixtisas üzrə formalaşan və müvafiq ixtisasa ən aşağı balla qəbul olan abituriyentin balına bərabər olan göstəricidir. Keçid balı müəyyən bir ixtisas üzrə müsabiqədə iştirak edən abituriyentlərin sayı, həmin ixtisas üzrə plan yerləri və abituriyentlərin imtahan nəticələrindən asılı olaraq formalaşır.



    Mən orta məktəbdə əla qiymətlərlə oxuyuram. Bilmək istəyirəm ki, ali təhsil müəssisəsinə müsabiqə zamanı bu göstəricim nəzərə alınacaqmı?
    Müsabiqə zamanı ümumi balı eyni olan iki və daha çox abituriyenti bir-birindən fərqləndirmək məqsədilə bir neçə əlavə göstəricilərdən istifadə edilir. Təhsil haqqında sənədə (attestata) "Azərbaycan dili" (təlim Azərbaycan dilində olan məktəblərdə), "Rus dili" (təlim rus dilində olan məktəblərdə), gürcü dili (təlim gürcü dilində olan məktəblərdə), “Ədəbiyyat”, "Xarici dil", "Riyaziyyat", "Azərbaycan tarixi", "Ümumi tarix", "Fizika", "Kimya", "Biologiya", "Coğrafiya" fənləri üzrə yazılmış yekun qiymətlərin ədədi ortası müsabiqə zamanı ilk növbədə nəzərə alınan əlavə göstəricilərdən biridir.


    Mən keçən il kollec bitirmişəm. Bu il isə ali təhsil müəssisələrinə keçiriləcək qəbul imtahanında iştirak etmək istəyirəm. Bunun üçün hansı sənədləri təqdim etməliyəm?
    Siz orta ixtisas təhsiliniz haqqında sənədin əslini; şəxsiyyətinizi təsdiq edən sənədin əslini; təhsil aldığınız müəssisə tərəfindən verilən və orta ixtisas təhsilinizin dövlət hesabına olub-olmamasını təsdiq edən arayışı; attestatın əslini və ya məzunu olduğunuz təhsil müəssisəsi tərəfindən verilən və attestat qiymətləri göstərilən arayışı müvafiq SQK-ya təqdim etməlisiniz.

    Orta məktəbin rus bölməsini bitirirəm. Amma ali məktəbə qəbul zamanı ərizəmdə Azərbaycan bölməsinin ixtisas kodlarını göstərmək istəyirəm. Bu mümkündürmü?
    Ali məktəblərin I,II,III və IV ixtisas qrupları üzrə sənəd verən abituriyentlər orta məktəbdə hansı dildə təhsil almasından asılı olmayaraq ali məktəbə sənəd verərkən istədiyi bölməni (imtahan verəcəyi dili) - Azərbaycan və ya rus, seçə bilər. Bu zaman onlar seçdiyi bölmədə qəbul imtahanlarında iştirak etməli və ixtisas seçimi ərizəsində həmin bölməyə aid olan ixtisasların kodlarını qeyd etməlidirlər.
    Ali məktəblərin V ixtisas qrupu üzrə sənəd verən abituriyentlər:

    - cari ilin məzunları - müsabiqədə buraxılış imtahanının nəticəsi əsasında iştirak etdiklərinə görə orta məktəbi hansı bölmə üzrə bitirirlərsə həmin bölmə üzrə də buraxılış imtahanı verir və həmin bölmə (Azərbaycan və ya rus) üzrə də ali məktəblərin ixtisas seçimində iştirak edirlər;
    - orta məktəbin əvvəlki illərin məzunları - orta məktəbdə hansı dildə təhsil almasından asılı olmayaraq ali məktəbə sənəd verərkən istədiyi bölməni (imtahan verəcəyi dili) - Azərbaycan və ya rus, seçə bilər. Bu zaman onlar seçdiyi bölmədə qəbul imtahanlarında iştirak etməli və ixtisas seçimi ərizəsində həmin bölməyə aid olan ixtisasların kodlarını qeyd etməlidirlər;
    - cari ilin məzunları - təlim ingilis və ya gürcü dilində olan orta məktəblərin məzunları- onlar buraxılış imtahanını yalnız riyaziyyat və xarici dil fənləri üzrə verdiklərinə qəbul olmaq üçün ərizə təqdim etdikləri halda buraxılış imtahanında riyaziyyat (11-ci siniflər – riyaziyyat və xarici dil) fənni ilə yanaşı ərizədə qeyd etdikləri bölməyə uyğun olaraq Azərbaycan dili və ya rus dili fənnindən də imtahan verirlər.


    Rus bölməsində təhsil alıram, qəbul imtahanını da rus dilində vermək istəyirəm. Bildiyimə görə bu bölmədə təhsil alanlar Azərbaycan dili fənnindən də imtahan verməlidirlər. Bu imtahan barədə ətraflı məlumat almaq istərdim.
    Rus bölməsinin abituriyentləri “Azərbaycan Respublikasında Dövlət dili haqqında” Azərbaycan Respublikasının qanununa əsasən, “Azərbaycan dili” fənnindən test imtahanı verirlər. Bu imtahanın nəticəsi “məqbul” və ya “qeyri-məqbul”la qiymətləndirilir, “məqbul” alanlar qəbul imtahanlarına buraxılırlar. İmtahanda abituriyentlərə “Azərbaycan dili” fənnindən 30 test tapşırığı təqdim edilir. Hər düzgün cavab bir balla qiymətləndirilir. Səhv cavablar yekun bala təsir göstərmir. Abituriyentin “məqbul” alması üçün onun topladığı bal DİM-in müəyyən etdiyi müsabiqə şərtini ödəməlidir. Rus bölməsinə sənəd verən abituriyentlər üçün “Azərbaycan dili” fənnindən imtahan iki dəfə keçirilir. Birinci imtahanda iştirak edə bilməyən və yaxud “qeyri-məqbul” alan abituriyentlər ikinci imtahanda iştirak edə bilərlər.

    Mən I ixtisas qrupu üzrə imtahana hazırlaşıram. Milli Aviasiya Akademiyasına daxil olmaq istəyirəm. Oxuduğum məktəbdə bizə xarici dil kimi fransız dili tədris olunur. Qəbulda xarici dil kimi fransız dilindən imtahan verə bilərəmmi?
    Milli Aviasiya Akademiyasının I qrup ixtisaslarında təhsil almaq istəyən abituriyentlər qəbul imtahanında xarici dil kimi yalnız ingilis dili fənnindən imtahan verməlidirlər.

    Mən Rusiya Federasiyası Dağıstan Respublikasının vətəndaşıyam və orta məktəbi Dağıstanda bitirmişəm. Bu il Azərbaycan Respublikasının ali təhsil müəssisələrinə qəbul imtahanında iştirak etmək istəyirəm. Sənədlərimi hansı qaydada və harada təqdim etməliyəm
    Siz ümumi qaydada elektron ərizə doldurub tələb olunan sənədləri (bunların siyahısı “Abituriyent” jurnalının ərizə qəbulu elanı dərc olunacaq 2-ci sayında göstəriləcəkdir) DİM-də və ya onun regional bölmələrində yaradılmış SQK-lardan hər hansı birinə təqdim etməklə ərizənizi təsdiq etdirməlisiniz.

    Yunan-Roma güləşi üzrə beynəlxalq yarışın qalibiyəm. Ali təhsil müəssisəsinə müsabiqədənkənar qəbul ola bilərəm?

    “Təhsil haqqında” Azərbaycan Respublikası Qanununun 26.5-ci maddəsinə əsasən dünya fənn olimpiadalarının, yüksəksəviyyəli beynəlxalq müsabiqələrin və yarışların qalibləri müvafiq ixtisaslar üzrə ali təhsil müəssisələrinə müsabiqədənkənar qəbul olunurlar. Ancaq qeyd etmək lazımdır ki, müvafiq ixtisaslar üzrə ali təhsil müəssisələrinə müsabiqədənkənar qəbul olunmağa əsas verən dünya fənn olimpiadalarının, incəsənət sahəsi üzrə yüksəksəviyyəli beynəlxalq müsabiqələrin siyahısı Azərbaycan Respublikası Nazirlər Kabinetinin 2010-cu il 25 iyun tarixli 119 nömrəli qərarı ilə, idman sahəsi üzrə  beynəlxalq yarışların siyahısı isə Nazirlər Kabinetinin 2012-ci il 26 iyul tarixli 159 nömrəli qərarı ilə təsdiq edilmişdir. Sonuncu qərara əsasən yalnız Olimpiya oyunları və olimpiya idman növləri üzrə Dünya və Avropa çempionatı və birincilikləri, Beynəlxalq Olimpiya Komitəsi tərəfindən tanınmış qeyri-olimpiya idman növləri üzrə Dünya və Avropa çempionatı və birinciliklərinin qalibləri müvafiq ixtisas üzrə ali təhsil müəssisələrinə müsabiqədənkənar qəbul olmaq imkanına malikdirlər. 



    Mən elektron ərizəmi təsdiq etdirmişəm. İmtahanın nə vaxt və harada keçiriləcəyi barədə məlumatı necə əldə edəcəyəm?
    İmtahandan 3-4 gün əvvəl buraxılış vərəqələri DİM-in internet səhifəsində yerləşdiriləcək. Vərəqədə imtahanın keçiriləcəyi tarix və yer haqda tam məlumat olacaq.

    Məlumdur ki, ali məktəblərə qəbul imtahanları zamanı abituriyentin doğru cavabların sayından səhv cavabların sayının 1∕4-i çıxılır (dörd səhv cavab bir doğru cavabı “silir”), bəs açıq tipli test tapşırıqları üzrə də bu qayda tətbiq edilir?
    Xeyr, açıq tipli test tapşırıqları üzrə səhv cavablar doğru cavabların sayına təsir göstərmir.