Qəbul haqqında elan

Line Spacing+- AFont Size+- Çap

Dövlət İmtahan Mərkəzi 2017/2018-ci tədris ili üçün rezidenturaya qəbul elan edir

1. Rezidenturaya qəbul  “Azərbaycan Respub­li­ka­sın­da  rezidenturaya qəbul qaydaları”na (bax: “Rezidentura” jurnalı, 2017, №1, səh. 2) uyğun olaraq Dövlət İmtahan Mərkəzi (bundan sonra – Mərkəz) tərəfindən aparılır. Rezidenturaya qəbul olunmaq hüququna Azərbaycan Respublikasında baza (əsas) ali tibb təhsili almış şəxslər, yaxud ali tibb sahəsində müəyyən edilmiş qaydada ixtisası nostrifikasiya edilmiş xarici ölkələrdə təhsil almış şəxslər (bundan sonra – namizədlər) malikdirlər.

2. Qəbul imtahanında iştirak etmək üçün ərizə qəbulu internet vasitəsi ilə aşağıdakı qaydada aparılır.

Namizəd:

-    ekabinet.dim.gov.az internet səhifəsində “Şəxsi kabinet” yaratdıqdan sonra (bax: “Şəxsi kabinet”in yaradılması və istifadə qaydası) ərizə vermək üçün tələb olunan məbləği kabinetindəki hesabına əlavə edir;

-    tələb olunan məbləği hesaba əlavə etmək üçün təqdim olunan ödəniş üsullarından (bax: payment.dim.gov.az) istifadə etməklə 16-rəqəmli ödəniş kodu əldə etməlidir;

-    yalnız “Şəxsi kabinet”inin istifadəçi adı və parolundan istifadə etməklə 2017-ci il martın 10-dan 17-dək Mərkəzin müvafiq internet səhifəsinə (http://eservices.dim.gov.az/erizerez/erize) daxil olub, “Namizədin elektron ərizəsi” formasını doldurur və təsdiq edir (etdirir).

Ətraflı məlumat jurnalın 3-6-cı səhifələrində və http://eservices.dim.gov.az/erizerez/erize səhifəsindəki aktual keçidlərdə verilmişdir.

2.1. Rezidenturaya qəbul üzrə müsabiqədə iştirak etmək üçün Azərbaycan Respublikasında yerləşən  ali təhsil müəssisələrini bitirmiş və ya cari tədris ilində bitirən bütün namizədlər Mərkəz tərəfindən müəyyən edilmiş müddətdə Mərkəzin rəsmi internet saytında “Namizədin elektron ərizəsi”ni dolduraraq özləri təsdiq etməlidirlər.

Digər namizədlər müsabiqədə iştirak etmək üçün Mərkəz tərəfindən müəyyən edilmiş müddətdə Mərkəzin rəsmi internet saytında “Namizədin elektron ərizəsi”ni doldurmalı və aşağıdakı sənədlərin əslini Mərkəz tərəfindən yaradılmış Sənəd Qəbulu Komis­siyalarına (bundan sonra – SQK) şəxsən təqdim etməklə ərizələrini təsdiq etdirməlidirlər (Ünvan: Bakı şəh., Yasamal r-nu, M.Müşviq küç., 1M):

2.1.1. Azərbaycan Respublikasının vətəndaşları şəxsiyyət vəsiqələrini, əcnəbilər icazə vəsiqələrini və pasportlarını, vətəndaşlığı olmayan şəxslər yaşadıqları ölkənin hüdudlarından kənara getmək üçün onlara verilən sənədləri və icazə vəsiqələrini, Azərbaycan Respub­likasında daimi yaşayan vətəndaşlığı olmayan şəxslər şəxsiyyət vəsiqələrini, qaçqın statusu almış şəxslər və onların ailə üzvləri qaçqın vəsiqələrini, onlara verilmiş yol sənədini, beynəlxalq müqavilələrdə nəzərdə tutulmuş hallarda digər sənədləri və ya icazə vəsiqələrini;

2.1.2. baza ali tibb təhsili haqqında sənədi və ona əlavəni;

2.1.3. xarici ölkələrdə ali təhsil almış şəxslər Azərbaycan Respublikasının Təhsil Nazirliyi tərəfindən verilən ixtisasın tanınmasının və ekvivalentliyinin müəyyən edilməsini təsdiq edən sənədləri;

2.1.4. xarici ölkələrdə ali ixtisas təhsili almış, diplomdan sonra ixtisaslaşma keçmiş Azərbaycan Respublikasının vətəndaşları olan həkimlər Azərbaycan Respublikası Səhiyyə Nazirliyi tərəfindən verilən “Tibbi və əczaçılıq fəaliyyəti ilə məşğul olmağa buraxılması barədə şəhadətnamə”ni.

2.2. Əcnəbilər və xarici ölkələrdə təhsil almış şəxslər 2.1-ci bənddə qeyd olunan sənədlərlə yanaşı, həmin sənədlərin notarial qaydada təsdiq edilmiş Azərbaycan dilinə tərcüməsini də SQK-ya təqdim edirlər.

2.3. Ərizələrin qəbulu zamanı dövlət sifarişi əsasında rezidentura təhsili almaq istəyən namizədlər reziden­turanı bitirdikdən sonra Azərbaycan Respublikasının Səhiyyə Nazirliyi tərəfindən müəyyən edilən tibb müəssisələrində 3 (üç) il müddətində əmək fəaliyyəti ilə məşğul olacaqları barədə məlumatlandırılırlar. Bu namizədlər elektron ərizəni təsdiq etdikləri andan qeyd edilmiş öhdəliyə razılıq vermiş hesab olunurlar.

Azərbaycan Tibb Universitetinin Hərbi Tibb fakültə­sinin məzunları rezidenturaya qəbul imtahanlarında iştirak etmək üçün Azərbaycan Respub­li­ka­sının Müdafiə Nazirliyi tərəfindən müəyyən olunmuş müddətdə müvafiq fakültəyə müraciət etməlidirlər. Müraciət edənlərin siyahısı Mərkəzə təqdim olunduqdan sonra, onlar ”Namizədin elektron ərizəsi” formasını doldurur və  təsdiq edirlər.

3. Baza ali tibb təhsili əsasında rezidenturaya qəbul imtahanı Mərkəz tərəfindən mərkəzləşdirilmiş qaydada iki mərhələdə keçirilir:

- baza fənləri üzrə biliklərin qiymətləndirilməsi;

- ixtisas fənləri üzrə biliklərin qiymətləndirilməsi.

3.1. baza fənləri üzrə biliklərin qiymətləndirilməsi imtahanı 2017-ci il aprelin 9-da, ixtisas fənləri üzrə biliklərin qiymətləndirilməsi imtahanı isə 2017-ci il iyulun 5-də keçiriləcəkdir.

İxtisas fənləri üzrə biliklərin qiymətləndirilməsi imtahanına baza fənləri üzrə biliklərin qiymətləndirilməsi imtahanında topladığı bal 40 və daha çox olan namizədlər buraxılırlar. İxtisas fənləri üzrə biliklərin qiymət­lən­dirilməsi imtahanına buraxılmış namizədlər tələb olunan məbləği “Şəxsi kabinet”lərinin hesabına əlavə edib  
2017-ci il mayın 15-dən 22-dək qeydiyyatdan keçməli­dirlər. Qeydiyyatdan keçməyən namizədlər imtahana buraxıl­mayacaqlar.

Namizədlərə hər mərhələdə 100 test tapşırığı təqdim olunur. Hər iki mərhələdə namizədin hər bir test tapşırığına düzgün cavabı 1 (bir) balla qiymətləndirilir. Səhv cavablar namizədin imtahan nəticəsinə (yekun balına) təsir göstərmir.

3.2. Hər bir mərhələdə imtahan suallarının cavab­landırılmasına 2 saat 30 dəqiqə vaxt ayrılır.

3.3. Qəbul imtahanı Bakı və Naxçıvan şəhərlərində keçirilir.

3.4. İmtahanda iştirak etmək üçün namizəd 2017-ci il aprelin 3-dən etibarən baza fənləri üzrə biliklərin qiymətləndirilməsi imtahanı üçün, iyunun 25-dən etibarən ixtisas fənləri üzrə biliklərin qiymətləndirilməsi im­tahanı üçün “Namizədin imtahana buraxılış vərəqəsi”ni http://eservices.dim.gov.az/erizerez/brxvrez internet səhifəsindən çap edib götürür.

Namizədlər imtahanda iştirak etmək üçün imtahan gününə müvafiq olan “Namizədin imtahana buraxılış vərəqəsi”ni və şəxsiyyəti təsdiq edən sənədin əslini mütləq gətirməlidirlər. İmtahanın keçirilmə vaxtı və yeri “Namizədin imtahana buraxılış vərəqəsi”ndə göstərilir.

4. Müsabiqəyə baza fənləri üzrə biliklərin qiymətləndirilməsi imtahanında topladığı balı 40-dan, ixtisas fənləri üzrə biliklərin qiymətləndirilməsi imtahanında isə 50-dən, ümumi balı 90-dan az olmayan namizədlər buraxılırlar.

4.1. Müsabiqəyə buraxılan namizəd 2017-ci il iyulun 7-dən 14-dək “Rezidentura üzrə ixtisas seçimi cədvəli”nə əsasən, bitirdiyi baza ali tibb təhsili istiqamətinə müvafiq olan ixtisaslardan istəyinə uyğun olanlarını seçərək, onların kodlarını  elektron ərizəsindəki ixtisas seçimi formasına istədiyi ardıcıllıqla daxil edib təsdiqləyir (bu haqda əlavə məlumatlar “Rezidentura” jurnalının 2017-ci il 3-cü nömrəsində veriləcəkdir).

5. Seçilmiş ixtisasların ərizə formasında göstərilən ardıcıllığı müsabiqə zamanı əsas kimi qəbul olunur və namizəd topladığı bala əsasən müsabiqədən keçdiyi ilk ixtisasa yerləşdirilir.

Müsabiqə zamanı ümumi balı eyni olan iki və daha çox namizədi fərqləndirmək üçün aşağıda qeyd edilən ardıcıllıqla əlavə göstəricilər nəzərə alınır:

- baza ali tibb təhsili üzrə ümumi orta müvəffəqiyyət göstəricisi (ÜOMG);

- ixtisas fənləri üzrə biliklərin qiymətləndirilməsi imtahanından toplanılan bal.

5.1. Ümumi balı eyni olan iki və daha çox namizədi bir-birindən fərqləndirmək mümkün olmadıqda onların hamısı müvafiq ixtisasa yerləşdirilir.

5.2. Müsabiqənin nəticələri açıqlandıqdan sonra boş qalan yerlər elan edilir, namizədlər tərəfindən 4-cü  bənd nəzərə alınmaqla ixtisas seçimi həyata keçirilir və həmin yerlərə müsabiqə yolu ilə yerləşdir­mə aparılır.

6. Hər hansı bir ixtisasa yerləşdirilmiş namizəd tələb olunan sənədlərin əslini Mərkəz tərəfindən müəyyən edilən 10 günədək müddətdə qəbul olduğu tibb müəssisəsinin tabe olduğu mərkəzi icra hakimiyyəti orqanına:

-      Azərbaycan Tibb Universitetinin Hərbi Tibb fakültəsinə qəbul olmuş şəxslər Azərbaycan Respublikası Müdafiə Nazirliyinə;

-      Naxçıvan Dövlət Universitetinə qəbul olmuş şəxslər Naxçıvan MR Səhiyyə Nazirliyinə;

-      Azərbaycan Tibb Universitetinə və digər klinik bazalara qəbul olmuş şəxslər isə Azərbaycan Respublikası Səhiyyə Nazirliyinə şəxsən təqdim etməklə qeydiyyatdan keçməlidir.

Namizədin bu müddətdə qeydiyyatdan keçmə­məsi onun yerləşdirildiyi ixtisas üzrə təhsil almaqdan imtina etməsi kimi qiymətləndirilir. Bu namizədlər boş qalan yerlər üzrə keçirilən müsabiqəyə buraxılmırlar.

7. Rezidenturaya keçirilən müsabiqə və onun nəticələri ilə bağlı namizədlərin müraciətlərinə baxılması üçün Mərkəz tərəfindən Apelyasiya Komissiyası yaradılır.

8. Namizəd müəyyən olunmuş müddətdə Apelyasiya Komissiyasına şəxsiyyəti təsdiq edən sənədin əslini təqdim etməklə, şəxsən müraciət etməlidir. Apelyasiya Komissiyasının qərarlarından inzibati qaydada və məhkəməyə şikayət verilə bilər.

9. Namizədə aşağıdakı hərəkətlərə yol verməsi qadağandır:

9.1. saxta və ya başqasına aid sənəd təqdim etmək, imtahana öz yerinə başqasını göndərmək;

9.2. imtahana mobil telefon və digər rabitə vasitələri, kalkulyator və digər elektron cihazlar, konspekt, lüğət, cədvəl, məlumat kitabçası və digər yardımçı vasitələr gətirmək və onlardan istifadə etmək;

9.3. yandırıcı, partlayıcı, kəsici, deşici, atıcı və digər bu kimi əşyalarla imtahan binasına girmək, özü ilə siqaret gətirmək;

9.4. “İmtahan başlandı!” elan olunan andan imtahanın sonunadək səbəbindən asılı olmayaraq, zalda yerini dəyişmək, gəzişmək, danışmaq və digər hərəkətlərlə imtahanın gedişinə mane olmaq;

9.5. “İmtahan başlandı!” elan olunan andan 1,5 saat müddət keçənədək və imtahanın son 15 dəqiqəsi ərzində imtahan zalından çıxmaq;

9.6. başqasının nəticəsinə təsir göstərmək, o cümlədən başqasının cavab kartına, sual kitabçasına baxmaq və ya öz cavab kartına, sual kitabçasına başqasının baxması üçün şərait yaratmaq, sualın cavabını soruşmaq və ya bildirmək;

9.7. nəzarətçiyə və digər şəxslərə test tapşırıqlarının həllində kömək üçün müraciət etmək;

9.8. cavab kartını və sual kitabçasını zədələmək, onları nəzarətçiyə təhvil vermə­dən imtahan zalından çıxmaq.

10. Namizədin 9-cu bənddə göstərilən hərəkətlərə yol verməsi halları Mərkəz tərəfindən aşkar edildikdə onun müsabiqə (imtahan) nəticələri ləğv edilir. Bu qərardan inzibati qaydada və  məhkəməyə şikayət verilə bilər.